پاک فوج ہر قسم کے چیلنجز سے نمٹنے کیلئے پرعزم ،خودمختاری اور علاقائی سالمیت کا تحفظ اولین مشن ہے،فیلڈ مارشل

لاہور(ڈیلی پاکستا ن آن لائن)فیلڈ مارشل سید عاصم منیر نے کہا ہے کہ پاک فوج ہر قسم کے چیلنجز سے نمٹنے کیلئے پرعزم ہے،خودمختاری اور علاقائی سالمیت کا تحفظ پاک فوج کا اولین مشن ہے۔
پاک فوج کے شعبہ تعلقات عامہ آئی ایس پی آر کے مطابق فیلڈ مارشل سید عاصم منیر نے لاہور گیریژن کا دورہ  کیا،فیلڈمارشل کو لاہور گیریژن میں آپریشنل تیاریوں پر بریفنگ دی گئی ،فیلڈمارشل نے فارمیشن کے زیراہتمام تربیتی مشقوں کا جائزہ لیا، آئی ایس پی آر کے مطابق آرمی چیف نے مستقبل کی جنگوں کے حوالے سے تیاریوں اور جدت اپنانے پر زوردیا،فیلڈ مارشل نے جوانوں کو فراہم کردہ کھیلوں اور تفریحی سہولتوں کو سراہا۔
آئی ایس پی آرکے مطابق آرمی چیف نے سی  ایم ایچ لاہور میں ہائی کیئر سینٹر کا بھی دورہ  کیا،فیلڈ مارشل نے طبی عملے اورانتظامیہ کی خدمات کی تعریف کی۔
آئی ایس پی آر کے مطابق چیف آف ڈیفنس فورسز نے لاہور گیریژن میں افسران سے خطاب  کرتے ہوئے کہاکہ قومی سلامتی کو خطرات کے حوالے سے زیرو ٹالرنس پالیسی ہے،پاک فوج ہر قسم کے چیلنجز سے نمٹنے کیلئے پرعزم ہے،خودمختاری اور علاقائی سالمیت کا تحفظ پاک فوج کا اولین مشن ہے،فیلڈمارشل نے کہاکہ افواج اعلیٰ معیار،نظم و ضبط اور بے لوث قومی خدمت کو فروغ دے رہی ہیں،پاک افواج ملک کی خود مختاری ،علاقائی سالمیت اور داخلی استحکام کے تحفظ کیلئے ثابت قدم ہیں،مستقبل کی جنگ، جدت اور لچک ناگزیر ہے،پاک فوج جدید تقاضوں سے ہم آہنگ ہونے کی بھرپور صلاحیت رکھتی ہے،جوانوں کی جسمانی فٹنس اور مورال ہماری ترجیح ہے۔
فیلڈ مارشل کی لاہور آمد پر کمانڈر لاہور نے استقبال کیا۔